Hla leh a phuahtu: Lal Isua kan thian tha berin

Joseph M. Scriven (1819-1896) hi Irish mi a ni a, kum 25 a nih laiin nupui nei tura hlim taka a inbuatsaih mek laiin, an inneih ni tura ruat hma chiah ni ah a nupui tur chu rapthlak takin tuiah an chesual a, a thi ta hlauh mai a, Joseph-a tan chuan a hrilhhai thlak duh khawp ang le. Thinlung hliam nasa tak tuarin Joseph-a chuan a awmna hmun chhuahsain, nun bul tan tha leh turin Canada a pan ta a. Canada ah chuan zirtirtu hna thawkin a inbengbel chho ta a ni. Chutia tui ti taka a hna a thawh lai chuan Eliza Roche, (a zirlai pakhat chhungte) nen intawngin an innelin an in hmangaih ta hle a, inneih ngei tumin an inhual ta hial a. Mahse hun a lo kal zel a, Joseph-a beiseina leh a lo mitthla thin zawng zawng ti tawp tur chuan Eliza chu na taka dam lovin an inneih hma chuan a thihsan leh ta!

Joseph-a chan hi han in chan ta ila, engkim hi a tawp ta vek niin a ngaih theih awm e. Amaherawhchu Pathiana a innghah tlatna hian beidawnna ruam atangin a khai chhuak a tih loh theih loh ang. Eliza-in a thihsan leh tak hnu chuan zirtirtu hna bansanin Plymouth Brethren a zawm a, Baptist kohhran ah rawngbawlna lamah a hun pum pek a tum chho ta a ni. Nupui neih leh reng reng a tum ngai ta lo va, a nun, hun, pawisa, thawmhnaw...etc. zawng zawng chu mi chanhai zawkte hnena hlan zovin, a kalna apiangah Lal Isua chanchin a hril pah ta zel a ni.

Eliza-i thih lai bawr vel khan, Joseph-a chuan an ram, Ireland-a a nu dam loh thu a dawng a. Han kal zung zung a remchan loh avangin a nu hnenah chuan lehkha a thawn ta a; chu a lehkhaah chuan a nu a thlamuanna thu bakah a hla ziak (poem) zinga pakhat, 'Lal Isua kan thian tha berin' (what a friend we have in Jesus) tih chu a chilh tel bawk a.

Kum tam tak hnuah chuan Joseph-a chu na tak hian a dam lo a, a damlo kan chuan a thian pakhat hian a rawn tlawh hlauh mai a. He a damlo a kan tum hian a thianpa chuan a hla thu ziak te chu en kualin tha a ti hlawm hle ni tur a ni, heng a poem zingah hian Lal Isua kan thian tha berin tih pawh a tel nghe nghe. A thianpa rawn kan nghawng kal zelah, a hmaa a nu hnena lehkha leh a hla a lo thawn tawh atanga kum 30 zet hnuah chuan Joseph-a hla chu lehkhabu pakhat, 'Hymns and Other Verses' tihah chuan tihchhuah tan a ni ta a. Hemi hnu lawkah hian musician thiam tak Charles C. Converse (1834-1918) a thluk siamsak in music mawi takin a lo thuam chho ta a, musician, revivalist ni bawk, Ira D. Sankey (1840-1908) chuan kum 1875 khan he hla hi Hla bu hriat hlawh tak Sankey's Gospel Hymns Number 1 an a telh ta nghe nghe a ni.

Joseph Scriven thih hnu hian Port Hope, Ontario, Canada-a mipuite, a rawngbawlsak thinte chuan a hriatrengna monument an siam a. Hun harsa leh hun khirh tak tak tawka paltlang thin chuan, a thian Isua neih a hrechiang a, a innghat ngam a, a lungngaihna zawng zawng in chhawk tirin he hla kan sak thin chhung zawng chu, thi tawh mahse a nung reng tawh dawn a ni.

“Mihringin a thian aia a nun a paih aliama hmangaihna nasa zawk tuman an nei lo.” ( Johana 15:13)