13th April 2016 20:25 Lirnghing kha

April thla a ni a, nitin ei chawp zawnga phili buai tan chauh pawh ni lo, sawrkar hna lu ber thleng paw’n khaw lum zia sawi hian kan titi chu a rual ber mai awm mang e tih tur khawpin khua a lum uap a. Engtik lai pawhin ruah leh tek tla thei reng dinhmunah a ding lawi si. Mihring hi a lo phunchair theih angreng khawp mai a, khua a lum deuh leh kan phun kan phun a, ruah a sur a, khawlum a ziaawm deuh leh kan hlauthawng leh si. Chutianga hringnun a inher chhoh mup mup lai kara lir lo nghing ve chhen chu a ti nghingtu kan ni ang tih te pawh hlauhawm khawp a ni!

Ka birthday dik tak: Ka nu-in April ni 12 hi ka pian cham nia a lo sawi thin avangin ka lehkha zir laia ka document pawimawh zawng zawngah April ni 12 angin ka dah vek tawh a. Mahse hman kumah, Baptisma Certificate ka mamawh laiin ka lo nei tawh si lo, min Baptist tu, Rev. Thangpuiliana of Chaltlang hnen atangin lakchhuah (signature) a ngaih avangin Kohhran Secretary hnen atanga lehkha bîk keng chungin ka han zawng chhuak vang vang a. Kohhran leh Rev. Pu Thangpuiliana record-ah erawh 13^th April a lo ni si. Ka insawifiah fe hnuah a sign thei ta hram a, lehlam lehlama sign tur a nih laiin, a lehlam lehlama a hming sign erawh a la inang lo zui! Kohhran record hi a dika ka rin zawk avangin ni 13^th April hi ka pianni dik zawk niin ka hria.

Power Supply kan nei lo bik: Manipur khawpui, Imphal-ah meuh pawh SP lo ni tawh leh an khuaah Kohhran Upa, hausa ve tawk takin kan venga concrete building sak sa lian tak, man to taka a leiah, kaw khat luahin ka nupui leh fanu te nen, kan pathumin kan cheng ve rai rai a. Chu building kaw 9 zet awmah chuan line a hran bik vang nge maw ni, power supply nei lovah kan tang bik a. Nilenga hnathawh chauh nen, khaw lum avanga thlan ban chup nen intihfai pawh a phurawm loh khawp mai. Intihfai mai a la ni lo… nilai zan a ni a, Kohhran inkhawm zan a la ni leh ta nghal, inkhawm phei chu a peihawm loh lehzual.

                Mahse kan nu-in inkhawm hram tura min tih avangin peih lo tak chungin inkhawm turin ka in ruahman ta a. Power supply kan nei si lo, darthlalangah ka inhmuh leh hmuh loh pawh hre lovin ka thawmhnaw hmuh hmasak sak ha chhuakin tan dar dik dawn tepah Biak In ka thleng ve thei ta hram a, zai erawh a tui hle. Ka thlen tlai em avangin ka zai tui dawn chauh emaw ka tih laiin tan darin a zui ta nghal mai a, inkhawm kan tan chu a ni ta der.

Inkhawm boruak: Chairman a ding a, Pathian thu a chhiar a tawngtaina hun te a hman zawh chuan Kohhran thupuan te kan ngaithla a. Eizawnna avangin tantu tura ruat sa chu a hnathawhna hmuna a awm thu te leh Kohhran chhungkaw pakhat, member panga (5) lai awmna lawm luh a nih tur thu ngaihthlak a ni a. Tichuan Chairman chuan tantu a awm tak lovah chuan nu ho zing a pakhat chu tawngtai turin a sawm chawpchilh a, inkhawm kan tan ta.

                April ni 13 zan hian thupui tha tak mai; ‘Mihring chu vantirhkoh aia hnuai deuh chauhva siam a ni’ tih kan zir a. Thupui sawi hawng tura ruat a rawn ding chhuak a. Tantu a awm loh avanga Bible chang tarlan chhiar a nih loh avangin a chhiar hnuah Kaihhruaina thupui bu a han chhiar tan a. Inkhawm te paw’n uluk takin, a bu en chungin kan lo ngaithla thap a. Chutah, phek khat leh a chanve vel a chhiar hman chiah chiah awm mang e tih ah, dar 7:25 bawr velah chuan kan Biak In chu a nghawr deuh der der hian a hriat a. Ka bula thu ka en a, a ke hi a lo ti sai deuh hlek hlek a. Chumi avanga nghing deuh der der turah chuan ka ngai a. Mahse chumi chu keimah chauh pawh nilo, kan thupui hawngtu thleng chuan an lo hria chu niin, a lehkha chhiar lai a tawp a, a’n ngaichang vang vang a. Chumi hnuah chuan a zawm deuh zat hian a rawn sai deuh hlak hlak a; kan thupui hawngtu pawh chuan, ‘Lir a nghing a ni awm e’ a rawn ti chhuak a. A sawi na tial tial a, beisei aiin a rei ta zek a; mipui kan chiai chu a ni ta ber mai.

                Biak In pawna hmeichhe au chel chul chu ka han hre pha vau vau a, kei erawh nilai thupui bu enin che lêk lovin ka la thu reng. Biak In chhunga Kohhran inkhawm te ngei ngei pawh chu an phawklek ta viau ni ngei tur a ni, an tlan chhuak sup sup mai a, chutih lai chuan kei pawh ka pum chu a sawi dar dar mai a, thin phu a rang duh hle mai. Mahse ka dinna ngaiah ka la ding reng, ka che eih lovang. An tlan chhuah tak sup sup avang leh a nat tial tial a, a rei tak zêk hnuah chuan ka bula thu  ngei pawh chuan min rawn kân mai tumin a ke chuan ka khup a rawn tai fua mai a, mahse min kan ta lem lo ni awm tak a ni.

                Chutia thinphu dup dup chunga lehkhabu ka bih reng chu ka han hawichhuak a, inkhawm hruaitu te, thupui hawngtu te chu an lo bo vek tawh mai a, ‘Mi Thianghlim Lawr’ a thleng ta emaw ka ti hman tep a, kan Upa te thutna lam ka han hawi phei a, an lo kim lo nasa. Kohhran Committee zinga a upa ber pawh chu a tar a tarin muang fan em ema tlan chhuah ve tumin a lo pen ve tak suap suap a. Chutah ka hnung ding lam ka han hawi a, hmeichhe ho an lo in hnawh tût mai bawk a, kan thupui zirlai pel rak khawpin Pathian ropuina chu chhiatna emaw tiin insaseng mai kan lo tum mek hlawm hi a lo ni a. Ka hmuh theih chinah chuan kan Tual Upa pakhat leh kan kawmthlangpa nen chiah che lovin kan awm ni ber hian ka hria (midang pawh an lo awm maithei bawk e) Lirnghing a zo fel a, thutna ngaiah an han thu leh sang sang a, hlauthawnna leh nuihzatthlak a inzat a, thlarau lamah lah kan sang sawt ni tur a ni; zan dang ai daihin sawi ho tur hunah ding kan tam! Lirnghin hma leh hnu thlarau chu inthlau tak hi a ni ringawt; kan zai te, kan tawngtaite chuan tihtakzetna nen kan ti a ni tih a tarlang hliah hliah.

Inkhawm kan bang: Inkhawm ban meuh chuan lirnghing chungchang review a tam hle mai. Kohhran zaipawl hla zir nghal tur a nih rualin keipawn hla zir chu ngai pawimawh viau mah ila, ka nupui fanaute thlabar lutuk tur ka thlamuan theih hlauh takin tih thu-hlaah ka haw tlang ta nal nal a. Rin lâwk ang ngei ngeiin an lo thlabar hle mai a, aftershock hlauh avangin hmun danga tlan chhuah an lo tum mek lai nen kan intawk a. Tlanchhe ta lo chuan kan inah kan lut a, a him deuh nia an hriat vang nge pawh ka hre lo, kan colony-a kan thenawm khawvengte pawh kan inah chuan engemawchen an rawn lut khawm a. Biak Ina inkhawm boruak report ka pekte chu lawmin kan nui tak dar dar a.

                Inkhawm ban hnu chuan lirnghing report kimchang te ka han hria a. Myanmar (Burma) bawr vel atangin, magnitude 7 velin a nghing siper kan lo dawng chu lo niin, ka hlau leh hnuhnawh angreng khawp mai. Tichuan zanin lirnghing hian thil tam tak min ngaihtuah tirin rilru pawh nasa takin, a nuihzatthlak lam te, a thlarau lamte pawh a ni ang; thil tam tak min ngaihtuah tir:

1.       Mizoramah hian ringtute hi kan zalen lutuk a; harsatna leh buaina lo thleng te hmachhawn dan kan lo la thiam lo mang e…

2.       Vanram thlen hlan nghakhlel em em nia insawi tam tak hian khawvel hi kan la thlahlel hle.

3.       ISIS hovin kan Biak In kawt velah silai rawn tlir ta vak vak se tiang khan kan awm kher ang em?

4.       Kan Pathian Biak Inah ngei pawh kan ngaih a ngam loh chuan khawi hmun dangah vak nge kan ngaih a ngam chuan ang le?

5.       Power supply kan neih loh bik avanga thim thamah ka insiam avangin ka lu sahriak ka thih theihnghilh kha tuman an sawi lo; ka pheikhawk bal var paw phuk lah an sawi hek lo; vawiina kuhva 20  chuang man ka ei avang leh ka ha ka nawh hman tah si loh avanga ka ha bal tuman an hriat loh phah! Chhiatna thlen lem lo hian nghing fo se ka va ti si em!!!

Faith Promise thuchah: Hani nun atanga kan zirtur

I Samuela 1:10&11, 20, 27 & 28 

Hani (Hebrew: Channah or H.annah) hi Elkana nupui, Thuthlung Hluia zawlnei Samuela nu a ni. Hebrai tawng chuan "Hannah" tih a ni a, chu chuan awmze hrang hrang a nei a, a awmze tlanglawn berah chuan khawngaihna emaw duhsak tihna a ni.

• Samuela lehkhabua kan hmuh angin Hani hi Elkana nupui pahnihte zinga pakhat a ni a, a nupui pakhat zawk chu Penini a ni a. Penini hi chuan fate a nei.
• Hani erawh a chin avangin a nei ve thei lo.
• Silo khuaah Pathian hnena inthawi turin an kal thin a, Penini chuan fate a neih avangin a fate ho zawng zawng nen chanvo a siamsak thin a, Hani erawh fa a neih ve loh avangin chan khat chauh a siamsak thin.
• Hei vang hian amah er em emtu Penini chuan a lo deuhsawh vel thin a ni.
• Ni khat chu Temple-ah kalin Pathian hnenah lungchhe taka tapin nasa takin a tawngtai a, ri lo leh hmui phun ringawta a tawngtai avang chuan amah lo thlir rengtu Puithiam Elia chuan a rui emaw a ti hial a, fapa a dil a ni.
• A tawi zawngin, he a tawngtaina hi Pathianin a ngaithla reng a, a hnuah nau a pai a, fapa a hring a, “Lalpa ka dil a ni” tiin a hmingah Samuela a sa ta a ni.
• "... I bawihnu hi fapa i pek chuan, a dam chhung zawng LALPA ka pe ve thung ang a, a lu pawh meh reng reng a ni lovang..” tiin faith promise, rinna thutiam a tiam a, fapa a hring a, Pathian rawngbawl turin a hlan let leh a, Samuela chu Bible-a mi ropui berte zinga mi a ni ta hial a ni.

I.      Faith Promise chu Pathian hnena thil dil a ni:
    Kan duh leh mamawh atana Pathian dil— (I Sam. 1:11a)
    * Chhanna fumfe tak kan duh chuan, ngenngawl takin dilna fumfe tak Pathian hnenah kan thlen ang.
    * Kan Pathian pawh hian kan thil dil min pek hi a chak a, nuam pawh a ti hle in a rinawm.
    * Kan tawngtaina chhana a awm hian Pathian a ropui thin a ni.
    * Hani hian fa a dil mai lo, fapa a dil a ni!

    Engemaw atana Pathian dil— (I Sam. 1:11b)
    * Hani’n a dil chhan chu Pathian hnena pek/hlan let a ni.
    * Fapa a neih chuan, a dam chhunga Pathian rawngbawl turin a ti a ni.
    * Engatan nge kan dil ve thin?
    * Faith Promise kan kalpui dan chu pawisa fai a ni tlangpuia; pawisa pawh kan dil mai dawn lawm ni? Luka 6:38-ah chuan, kan duh tak tak chuan, beng muka liam zawih zawih thlengin engpawh pek min tiam a ni.
    * Kan nawmsakna tur atan erawh Pathianin a remti lo tih erawh kan hriat a pawimawh. Jakoba 4:3-ah chuan, “In dila in dil dik loh avangin in hmu lo, in nawmsak nan hman in tum si...” a ti. Faith Promise erawh kan nawmsakna tur a ni lo, Pathian ram zauhna tur a nih avangin dil ang u, harsatna hrang hrang pawh tawk mah ila, dil zel ang u, min pe em em ang.

II.    Faith Promise chu chhanna hmu tura Pathian hnena innghah tlatna a ni:
    * Hani pasal khan a lungchhiatna kha hnem ngial a tum (I Samuela 1:8)
    * Mihringa innghah hian awmzia a nei lo
    * Kan Pathian hian keini aiin kan mamawh a hre zawk a, engkim a nei bawk.
    * Phil 4:19-ah chuan”...ka Pathian chuan Krista Isuaa a ropuina ngah zia ang zelin, in tlakchhamna tinreng pawh a phuhruksak ang che u...” a ti.

III.  Faith Promise chu chhanna hmuhna a ni— (I.Sam. 19-20)
    * Amah rinna tak tak nena kan dilna a thlawn ngai lo tih a lang.
    * Kan mamawh min pe: midangte kaltlang pawn a ni thin. Chu chhanna chuan thlarau tan chhandamna a thlen thei a ni.
    * Kan tawngtai hian Pathianin a chhang thin tih rinna nen kan tawngtai thin tur a ni. Jaboka 1:6-7 ah chuan rinna nena dil turin min ti a, ringhlel mi chu mi rilru bulbal nei lo, thiltih zawng zawnga mi nghet lo an ni a, Lalpa hnen atangin engmah hmuh inring suh se a ti hial a ni.
    * Faith a nih avangin rinna nena intiam tur kan ni.

IV.  Faith Promise chu Pathian hnena pek/hlan let leh a ni— (I Sam. 1:27-28)
    * Engkim mai hi Pathian khawngaihna avang liau liau a kan neih a ni.
    * Min chhandam a, min ti chak a, kan mamawh min pe a, heng zawng zawng hi min khawngaih vang a ni.
    * Keini pawn a tih dan hi kan zui ve tur a ni ang.
    Lawm taka pe tur kan ni—
    * Kan rohlu nia kan hriat te, kan pawisa te hi kan ta emaw kan ti thin!
    * Rilru phakar, rilrua uikawm em em, huamhauh em em te hi Lal Isua hian a lawm em em ka ring lo.
    * Kan Pathian hi uikawm ve ta se...????
    * Phal takin, lawm takin pe let mai tur kan ni.
    * Hani khan a fapa dil a hmuh khan lawm takin Pathian hnenah a hlan let mai a ni.

A tawp nan:
Chuti zat chu intiam ang u kan ti lo, amaherawhchu Pathian kan rin ngamna ang zat zelin i intiam ang u. Hruaitu dinhmun atang chuan member tinte hian a sang/sing tel intiam theuh thei ila chu duhthusam a ni. Mahse chu erawh Pathian thu a ni lo. Pathian kan rinna ang zelin intiam ila, chu kan intiamna chu a hlawhtlintheih nan tawngtai uar ila, chu kan intiamna chuan kan nitin nunah rah tha chhuah se; a chhanna kan hmuhah lungawi thiam ila, malsawmna kan dawn ang zelin pe let bawk ila, chu chu Faith Promise tum chu a ni. Ui lova a fapa min petu tan hian ui tur kan nei dawn em ni? tih in zawt chung zelin kan Rinna Thutiam hi i intiam ang u.