Ka tun hun hian ka lung min len :D

Ka hun kal tawh te ka thlir kir reuh reuh a, han chhuan tur leh han ngaih em em tur a vang khawp mai, 'pan lai nun' tih mai loh chu! Mi fate anga han awmthei chhungkua atanga seilian chu ni ila ngaih veng veng turte ka ngah ve viau ta lawng!

Ka lehkha zir ve thin lai te ka ngaihtuah kai zel a, mite anga thiamthei fal leh taima fal ni hek lo i; a ti tha pawl ni lo mah ila, tumna neih san ve avang hrim hrima tawngpawng pawl sang ve em em ringawt an tih ang chi han nih phei chuan, a khat mawi tawkin, "Lehkha kan zir ve lai kha..." tih bak sawi chhunzawm tur a vang duh khawp mai. Hun kal tawha lung han tih len tum ve viau pawh hian a leng tha duh lo viau khawp mai chu a nih ber hi maw... :D

Ka tun hun hian ka lung a ti leng...

Mahni tawka theihpa tawpa chin lem nei lova sual kawng zawh ve thin, a hun leh hmun pawh thlu lem lova sual lam kawng zawh ngar ngar mai; pawisak fahran pawh nei em em lova ka len laiin ka damchhunga ka lung ti leng turin Pathian kohna ka dawng hlawl a, rin loh khan ah, chan loh khanah tum loh takin rawngbawlna huanga phih awh ka lo ni ve ta hial a; mahse hei hian ka hmalam hun kawng thui takin a hawng dawn tih erawh ka hre reng mai.

"Vawiin ni kan hman dan te, kan tun hun kan hman dan te hian kan damchhung atana theihnghilh tawh loh tur thil min hnutchhiah" an lo tih thin hi a dikna ka hmuchhuak ve ni te hian ka hre thin. Kan nihna te, thiamna leh finna ten a phak loh tur thil kan chan fo te hian chu chu min hriatfiah tirin, kan nitin nundan te, mi zinga kan awmdan te leh fianriala kan awmdante min fimkhur tir a, chu fimkhurna chuan inchhirna min thlen ngai lo fo.

Dammawh hriltlan, zankhat mitchhin tawk tur pawh ni ila, ngaihthatna leh thlamuan veng vengna min pe a, chu tluka hlu chu mihring kan nih chhung hian han thlakhlelh tur dang awm vak chuang hian kei chuan ka hre lo. Chutiang nun hlim tak, thlamuanthlak tak nei tur chuan kan tun hun hi a va'n pawimawh tak em...