Krista avanga nihlawhna

Genesis 41: 37-45
Josua 24: 14-15
Thupuan 2:10

A thupui atang hian tarlan kan han tum chu a chiang sa viau awm e. Zing khu a lo var a, dam taka kan han harh hlawl mai te, kan han tho chhuak hlawl mai te, boruak thianghlim tak kan han hip vang vang mai te hi min siamtu in a thlawn liau liaua min pek a ni a, kan nihlawh em em a ni. Kan nihlawh zia erawh kan hrechiang tawk em(?) tih zawhna hi kan inzawh fo a pawimawh hle. A tam zawkah chuan Pathianin min hmangaihna hi kan hai der a, hre reng chung te'n kan tisual nasa em em a ni. Kan sualzia leh nihlawhna nasa taka kan chan lawi si avang erawh chuan, "Tihborala ka awm lo hi Lalpa zahngaihna a ni" tia lawm em em tur kan ni ringawt.

Kan tlin lohna leh fel lohna tam tak awm mahse Kohhran leh Khawtlangah te rawngbawlna hrang hrang kan chelh fir fer a, heng kan chanvo chan te hi kan theih leh tlin vanga rawngbawl kan ni ang tih a hlauhawm hle; Krista avanga khawngaih rawngbawl hna a ni tih kan hriatchian a tul hle awm e. He khawngaih rawngbawl hna thawk thei tur hian tumah tling zo an awm lo a, tling zo lo pawh an awm hek lo. Tling lo chung pawha rawng kan bawl hian mi tling lo tak takte pawh mi tling, mi pangngai kan loh nih ve phah thin- Krista vang a ni e.

Khawvel thil taka kan nihlawhnate:
Mi changkang leh mithiam, Officer lian tak tak a biak pawh kan biak phak mang loh tur khawpa keini dinhmun aia sang te, engtikah mah kan hmelhriat ni miah lo turte nen Krista vangin a Kohhran rawngbawlnaah huang khatah kan lawi za a. Engemaw chang phei chuan kan tirh dawr dawr changte pawh a awm ve fo thin. Mi Pathian leh a kohhran rawngbawlnaa mi inhmang takte chu mi mawlte pawh nise mite zah an hlawhin rin loh tak tak hmelhriat te an nei thin a, an nihlawh em em thin a ni.

Krista tel lo nihlawhna:
A leh lampang (a opposite) hi han tarlang ve leh lawk ila... Ringlo mi nihlawh tak takte kan hre thin a, tin Krista tel lohnaa nihlawh tak tak te pawh kan hre furin a rinawm. Khawvel thilah chuan nihlawh ang tak te pawhin an lang thei, engemaw chang phei chuan awhawm changte pawh an nei thin. Amaherawhchu kan Pathian thu vêkin, "Lalpan in a sak loh chuan a sa tute chu an thawkrim thlawn mai a ni..." a tih ang khan heng kan thiamna, kan hausakna te hian awmzia a nei reng reng lo. Krista tel lo chuan engmah a tlo ngai lo a; rawngbawlna huangah ngat phei chuan mihring taihmakna leh thahnemngaihna chuan tlin hle thin mahse, Lal Isua a tel loh chuan a dik famkim lo a, mualphona thlentu mai mai a ni thei a ni tih te pawh hriat tel a tha hle awm e.

Krista avanga nihlawh- Josefa:
Bible, a bik takin Thuthlung Hlui kan en chuan, chanchin hrang hrang ziak kan hmu nual a, heng ho zingah hian a tira Pathian thu awih meuh lo, sual ve tak tak, a hnua Pathianin a hman zui tak an awm deuh nual a. Mahse chutianga hming hliauna sawi tur nei ve lo, a tleirawl chhuah atanga Pathian tih tak, harsatna tam tak tawha a hun a hman lai pawha Pathian thu awih reng mai, a tawpa nihlawh ta em em mai, Josefa chanchin hi kan entawn atan a awhawm a, a nun atanga kan entawn atana thenkhatte chauh han tarlang ila:-

1. Mipat hmeichhiatnaah: Josefa chanchin chu naupan tet atanga kan hriat than a nih avangin a chanchin zawng zawng kan tarlang seng lo ang a...khatia a unaute'n an hralh kal zela Potiphara, an hunlaia nihna sang tak hnena a awm laiin, a pu nupui in a beisei tih kan hre theuh awm e. Han ngaihtuah ringawt pawh hian khatih hunlaia Potiphara dinhmun sanzia atanga chhut chuan nupui chhe tak a neih chu a rinawm loh a, in chep takah pawh an awm a rinawm loh. In zau nuam leh hahdam tak a nih ngei te pawh a rinawm. Tin pindan hrang te pawh a thahnem ve ta viau ang. Lo chetsualpui ni ta se tumahin an hriat pawh a rinawm kher loh. Mahse Josefa chuan Pathian huat ber a ni tih hriain a pu nupui a hnial fi-thla thak ngam a, a piin a puh let pawhin thiamthu sawi lovin thuawih takin a tawrh tlang thu kan hre theuh awm e. A insumtheihna hi a fakawm a, a entawn tlak em em a ni. Keini tawn tur ni ta se, thlemna do zo lo tur fe fe ve kan thahnem viau ta ve ang.

2. Talent nei tha tak a ni: Josefa talen kha kan hre theuh awm e, mumang hrilhfiah thiamna a nei a; a nuapan tet atangin mumang maksak tak tak a nei thin a, a hun lo awm tur nena inhmeh tak tak a ni hlawm. A unaute ngei pawn a mang avangin an huat phah. Hun lokal zelah tan inah te tangin a tanpuite mang a hrilhfiah sak a, tin Aigupta ram lal ber Pharoa mang thlengin a hrilhfiahsak zel a, Pharoa mi rin zawng tak ni chho zelin a nihlawh chho ta em em a nih kha. Pathianin talent a pek a ti pung a chu chuan sang takah vawrhin ram khat lal ber dawttu ah hial a awm theih phah a ni. Hei hian kan talent, a te tham emaw a lian tham emaw, eng ang pawh nise Pathian tan kan hman a, Pathian la hre ve ngai lote tana kan talent kan tihpun hian nihlawhna nasa tak kan chang thei a ni tih min hriatfiahtir se a duhawm hle.

3. Hmangaihnaa khat a ni: Josefa chanchin kha a Bible-a inziak bak a kip a kawiin hriat phak a ni tawh lo naa; mihring ve tho a nih avangin rilru hrehawm em em changte a ngah ang a, hlim chang te pawh a nei ang, tin, a thin te pawh a ur ve em em thin bawkin a rinawm. Mahse hmangaihnaa khat a nihna hi entawntlak tak a ni. kna Pathian thu vekin hmangaihna hi a dah pawimawh a, hmelmate thlenga hmangaih tura thu min pek hi Josefa nunah hian a thleng dik hle. A Pathian thu awihna hi a nihlawhpui hle a ni. A duh chuan amah hralhtu a unaute chungah khan phuba a la thei a, an nunna thlengin a laksak thei. Mahse phuba la lovin hmangaihna in a thungrul a, chhungkua an inhmuhkhawm leh theih phah ta a nih kha.

4. Nun ngil tak a ni: Ho tak taka pâwt kual mai mai thin, fiamthu thing tak tak thawha nui huar huar thin chu nise Josefa khan a dinhmun sang tak kha a luah zawh a rinawm lo. A naupan tet atangin thuawih thei mi, a pa thu pawh awih em em, a pa thuawih avanga a pa duat hlawh ta deuh bik pawh a ni nghe nghe. Harsatna leh hrehawmna tam tak a paltlang chungin a nun a ngil em em a, a tawpah Aigupta ram lu ber dawttu a nih theih phah hial a ni. Mi nun ngil takte hi Pathian hian chawimawi a hreh lo a ni tih kan hriat fo a tha hle.

Thih hnu thlenga nihlawhna a ni:
Thupuan 2:10 ah "Thih thlengin rinawmin lo awm rawh, tichuan nunna Lallukhum ka pe ang che" tih ziak a ni a. Krista hnaih a, a thu zawm chu an dam lai ngei ngei pawhin- mihringte ngaihah chuan chân angin lang thin mahse a tam zawkah chuan an nihlawhna hi a tam zawk thin. Dam laia nihlawhna ni bawk, thih hnu thlenga nihlawhna ni bawk, Krista leh a kohhran rawngbawl hna thawk a amah kan tan tlat hi ringtute tih tur a ni a, tih loh phal chi pawh niin a lang lo...

Chutiang taka nihlawhna- Isua Krista chu nasa lehzuala kan rin theih nan leh Pathian duh dana rawngbawlna kan kalpui zel theih nan Lalpan a thu malsawm rawh se; Amen

7th May 2012 (thawhtan) zan kan Branch Kristian Thalai Pawl inkhawm a ka thuchah sawi laktawi a ni