Hmangaih kaltate pualin...

2011 kum chawhnu lampang chu kan thleng chho leh ta der mai, mitin mai chu kan theihtawpa inbuatsaihna nen hunpui kan hmang chho a, hlim tak leh kan duh ang taka hman tumin beiseina sang tak nen kan phu suau suau hlawm a. Thenkhat kohhran lama a kul a taia an inhman laiin, thenkhat te erawh khawvel thil lamah, mahni taksa tih nawmna tur ngaihtuahin an hmanhlel a. Nula tlangval inhmangaih te tan hun lawmawm leh hun thawl tha a nih rualin chetsualna atan pawh hun tha tak te pawh a ni ta ve ang. Hetia thehtawp chhuaha kan hunpui kan hman karah hian mi thenkhat te erawh, rilru khingbai deuh taka inbuatsaiha hun hmang liam ve mawp mawp te rilruah an rawn lang a, he hunpui lo thleng chho mek hi lunglenna leh hmangaih kaltate hriatreng nan hun an hmang chho ve mek bawk.

December ni 23 khan kan thianpa thlan chei a ngaih avangin thlanmual lamah ka nileng hun ka va hmang ve a; a chhungte rilru tur ka suangtuah phak lo. Tih tur ve rengah ngaiin kan hnathawh tur kan thawh mawp mawp lai chuan thlan hrang hrang enkual turinin ka teikual vel a. Thlan cheimawi tak tak te chu a lo intung thet thut a, thenkhat erawh cheitu/chhungte nei lo ang mai hian engtik hun atanga enkawl tawh loh nge a nih pawh hriat loh tur khawp, thlan dang laih hnan mai chakawm khawpa ngaihthah te pawh a awm. Mahse thlan tam tak zinga mawi leh uluk em ema chei, mipa naupang kum 10 mi lek, a chungten an ui em avang(?)a mawi uluk leh danglam taka an chei chuan ka rilru a dek zak mai. "La damin kan zingah te la awm ve ni ta ni sela, heng mawi tak taka present tur ni awm tak tuam te hi han dawngin han hawng vel ta se, a lawm awm mange..." ti ni awm taka a thlan mawi tak chunga present an hun tlar del dul te, anni ang rual lawm tur toys let rim rem te chuan chuan mit a la in rilru a khawih ngei mai. Thlan dangah te pawh an damlaia an thil lawm ni awm tak tak thil chi hrang hrang hmuh tur a awm nawk mai. Heng thlan ka hmuh atang hian kan thianpa chhungte rilru tur chu ka tawmpui ve thei ta a.

Kumpui lingleta kan thlir leh kan nghahhlelh kumtawpa krismas leh kumthar hunpui a lo thlen hian chhungkaw kima hman ho kan thlahlel a, lehkhazirna, hnathawhna etc. hmun hla tak atang pawhin kan haw dawr dawr zela, chhungkaw kima kan inhmuhkhawm hian kan hlim tlang a thla a muang ve hliah hliah hle thin. Heng vang ringawt pawh hian kan then tak, kumkhuaa an hmel kan hmuh tawh loh tur te ngai vawng vawng chunga hunpui lo thleng nghah chu thil huphurhawm tak a ni awm e, chhungkaw kima la awm te tan kan vanneih zia min hriatchhuahtirtu te pawh a ni thei ang.

Chhungkaw kima awmte zawng zawng leh; hmangaih then ta te zawng zawng Pathian awmpuina chang zel tur leh hlim taka Krismas leh Kumthar hmang turin duhsakna ka hlan e.