Thinlaia'n i cham reng thin

Kan tleirawl chhuah chhoh lai vel hian thianzahovin kan inkawm thin a, pawl sawm kan ni ho a, kan pass(ed) ho a, higher kan zir ho thin. Higher kan zir ho lao hian kan thawvengin chanchin kan ngah thei hle a, kan school luhna-a a veng anga chanchin ngah ber pawl kan tling ang. Pawl sawm (Matric) passed hun nuam tih vanglai chho kha a ni a, engkimah kan confi ve em em thin a, kan hma hun zel ngaihtuah ai mahin kan tun hun kha kan lungkham zawk thin. Chutih hunlai, a ruala thian za-ho kan inkawma kan awm ho dual dual lai chuan a huhovin star kan nei thin a...

Chu kan star rawn em em thin chu nula pangngai pawh ni lo, nuthlawi dawr nghak hi a ni a, a dawr zawn thlen a, a hmel hmuh chu kan nghahhlelh leh kan thlakhlelh ber a ni thin. Kan thianzaho zinga a phanchang ber leh zaktheilo ber hian a'n chhaih ngei a, chuta a rawn hawichhuak hmel hmu pha chin han nih ngat chu a hnu zela sawitur ngah theihna; insawitheihna leh mahni-a awm pawha awm nawm veng vengna khawp chu a tling.

Mut mawh hnar mawh berah kan lo nei chho a, kan thianpa pakhat phei chuan a mang lamah nen lam a lo hmu thinin, a chanchin a ngaihven chhunzawm reng a, tun thleng hian han sawipui nikhua chang paw'n a titi tui berte zinga mi a tling hial teng a ni. 'A hunlai te te hi a awm a..' tia inhnem chung zelin kan thianpa pawh kan hrethiam thin khawp mai. Kha nuthlawi, kan star em em thin kha engtin awm zel tak ang maw...

Nikhua a lo rei a; kum lam paw'n upat lam a lo pan ta tial tial a; kan tunhma hunlaia kan nuthlawi ngaihzawn thin kha hunin a lo her liampui zel a, tun hnua han ngaihtuah let chang hian hmanlai mai piahlamah nuihzatthlak te pawh a lo chang ta der mai. Kan tun hun nen ka tehkhin lo thei lo. Tunhma kha chuan pakhat, chupawh thianzaho-a kan ngaihzawn rawn em em buaipui khan school kal nuam kan ti em em thin a, chutah result chhiat phah thakna khawpin amah mai bakah an school hmunhmate kan lo buaipuiin kan lo thlahlel thin kha a ni ngai a; tun hunaah hian engnge kan buaipuia, kan naute ho hian engnge kan thlakhlelh tak tih erawh sawi tur ka hre mai lo. Ka sawi duh tak erawh chu kan hunlaia kan lo mawl zia leh kha mawlna in a lo ken tel 'rilru thianghlimna' kha a ni.

Mawlna hi ka sawi hnawng a ni lo; mahse keimah/keimahniah chuan thianghlimna khan ka mawl thinna chhawmin; mimawl nih zahna lam ai maha inchhuang thei nihna min pe ta zawk a. Chu chu keimahah pawh pawimawh ka tihna lai ber chu ni ta chu a ni. Kum tawp lam tawh, at lai thil anga a eng ang kawng zawng pawha kan hun tawnin min hruai kawi theih hunlai a ni leh tawh tih ka hria, mahse naupan at laia rilru thianghlim tak put reng theih tluka hlu hi chu a awm chuangin a rinawm loh. Thlawi hmeltha, khawiah tak tuan ta che maw...