Pa Rama hriatreng nan...

Vawiin, ni 28.3.2013 hi min duhsaka min hmangaih em em tu, ka pa duhtak (Pa Rama) thih cham vawi khatna a ni a, amah hriatreng nan a vuinaa a chanchin tarlan tlem a zawng ka'n post teh ang.

Ramfangzauva (25.3.1948– 28.3.2012)

Pu Ramfangzauva hi Pu B.Llahlira (L) leh Pi Remmawii te fa hming koh niin E.Lungdarah kum 1948 ah a lo piang a. Unau 9 an ni a; mipa 6 leh hmeichhia 3 an ni a; chungte chu–
    1. B Ramfangzauva (L)
    2. B.Lalsangpuii (L)
    3. Thangzawni (L)
    4. PB Lalchhanhima (L)
    5. PB Lalhmingmawia
    6. B.Thanglura (L)
    7. Thangkima (L)
    8. Lungtiawii leh
    9. B. Thangzama te an ni.

Pu Ramfangzauva hi a naupan lai atangin lehkha thiam thei tak a ni a. E.Lungdar, Champhai leh Shillong-ah te ziarna a bei a. A school kal chhung hian a awmna leh pawl pui te zingah thiamthei leh rilru chak a nih thu an zirtuirtute hian an hrilhfâk a ni thin. Rambuai lai, kum 1966 khan tum khat chu a pa hian, “Ram te a buai si a, ram hrana awm chu...” tiin a lehkha zir pawh chhunzawm tawh lo mai turin a ti deuh a. Mahse amahin a zir chhunzawm chak avang leh a thiam thei tih tlang hriat  anih avangin a pa u, Pu Biakthanga(L) chuan Champhaia a pu C.Denga a hnenah thawn chho ta a. Chutah chuan Matric chu tha takin a pass leh ta mai a.

Matric a zawh hnu hian Shillong ah chhukthla-in mahni in chawmin a zir chhunzawm leh ta zel a. High School a kal lai atang hian Central Service IAS, Pilot etc. te hi a nih chak leh tum a ni thin a. BA Hons. a zawh hnu hian Competitive exam beiin kum 1977 khan Central Service, heng IPS, Income Tax leh Bank Probationary Officer te offer a ni a. Chuta zingah chuan a pa E.Lungdar-a mi thurawn angin Bank Officer (PO) hna hi a thlang ta a. Hetah hian training te a zawh hnuah Shillong leh Siliguri-ah te a thawk kual a; chumi hnuah Mizoram a rawn chuang chhuak a. Aizawl, Kolasib, Lunglei, Lawngtlai, Saiha, Champhai, Hnahthial, Serchhip-ah te a thawk kual thin a ni.

Tin, hetia State Bank of India-a a thawh lai tho hian Mizoram Rural Bank bul tan tute zingah pawh telin Mizoram chhungah Branch engemawzat a hawng nghe nghe a ni. Hetia Bank Service-a thahnemngai taka a thawh lai hian kum 2006 khan Voluntary Pension-in a chhuak ta a.

Bank Service atanga a chhuah hma reng hian Pathian rawngbawl hi a phak tawkah a tuipui em em a. A han pension tâkah chuan a theih ang tawka rawngbawlin a hun a hmang ta a ni. Tin, a boral dawn hnaih hian Bible Society lamah thahnemngai takin a la fehchhuak tang tang thin a ni.

Pi Muanzuali, Hnahthial khua nen Shillong-ah inchharin kum 1977, November ni 9 khan inneiin fa pali, mipa 2 leh hmeichhia pa 2 an nei a, chungte chu a upat dan indawtin–
    1. Dr.Benjamin Lalrammuana h/o Mimi Lalmawizuali
    2. Linda Lalrammawii
    3. Davy Lalruatliana
    4. Cordelia Lalramliani te an ni.
    A fa upa ber Dr. Benjamin hian fanu pakhat, Rosalind Vanzampuii an nei tawh nghe nghe a ni.

Aizawlah hian kum 30 zet mi in luaha veng hrang hranga an awm kual hnuin kum 2006 khan anmahni inhmunah, mahni in ngei luahin Zemabawk A-L Road-ah tunah hian an chhungkuain an khawsa ve ta a ni. Zemabawk a an khawsak hnu hian kohhranah– Bible Society-ah Convener niin Sunday School zirtirtu a ni a, kohhranah thuhriltu niin, kohhran committee peng hrang hrangah committee member a ni mek bawk a ni.

Kristian Hla Bu No. 150 na hi a hla duh berte zing a mi a ni.