I hlim em?

He thu hi thla hmasa (January 2013) atang khan ka rilruah a awm reng a, engtik lai pawhin ka in zawt reng thin. A fala ka awm changte hian Mi hlim tak ka ni em? “Ka hlim” ka tih hi hlimna tluantling leh hlimna tak tak a ni em (?) tih te ka ngaihtuah roh roh thin. Ka hlim nia ka hriat changte hian hlimna tak tak a ni em(?) tia inngaihtuah chungin hlim dan dik/ awm dan tur dik erawh min zirtir nasa va hle ni te pawn a lang.

Mihring, a bik takin tunlai thalaite-ah hian nun chhungril a ruak ru veng veng, kan awm dan leh nun dan kham khawp lohna hi a hluar hle niin a lang. Hlimna hi a pawimawh a, hlim kan duh luat vanga nun ruak, nun beidawng te pawh sawi tur an awm nawk. A thenin an dam khawchhuahpui laiin a then tan erawh mahni nunna lak duhna hial thlentir theitu a ni bawk. Mi hlim thei tak, engkima lungawi thiam te erawh an awhawm em em a, an mizia atang ringawt paw’n midangte tana malsawmna thlentu an ni thei thin.

Nang I hlim em?

Tehna tha ber chu ni lo mahse Mizo zinga facebook hmang thin kan thalai tam takte thu post hi ka chhiar ve thin a, ka thu chhiar tam zawk atanga teh chuan hlim loh rukna leh nun ruak/ beidawng kan tih ang chi te, kan panlai nun (naupan lai) kan ngaih thu te kan au chhuahpui chamchi thin. A tlangpuiin ngaihzawng avang te, nupui pasal thu-hlaah te, sum leh pai um luat avangte, ruihtheih thil leh thil dang dang a ni deuh fur. Heng hi mahni tawka hlimna kan zawn nasat luat avanga thleng a ni tlangpui awm e.

Kan naupan lai chuan “Mihring duhtawk chin chu ‘A aia tam’ a ni” tiin kan zir thin a, a dik pawh a dik viau. Duhamna hi kan hmelma lian tak pakhat a ni. Kan duh ang tawkin hlimna kan zawng a, kan hmu a, chu hlimna kan tih chu kan hmalam hun atan kan hlimna a ni reng lo. A aia hlimna dang a awm kan ring a, kan zawng zel a, kan hmu emaw kan tia... “Hetah hian ka hlim tawk” tia duhtawk ni reng a awm thei lo. Kan theihtawka kan hlimna zawn bawk khan a hnuah hlim lohna, damchhung hrehawmna, buaina etc. min thlen chang a awm fo thin reng a ni. Bible-a Lal Solomon-a, a hunlai na na na chuan duh duh nei thei, mipat hmeichhiatna lamah lah a mit it zawng apiang hlah ngai lo, khawvel rosum pawh duh thâla tam nei ngei pawh kha; hetia han ngaih mai chuan a awhawm viau. Mahse heng khawvel ropuina zawng zawng hi “Engmah lo mai” a lo ti ve thlawt reng a ni. Mi lar, kan ngaihsan em em te hi a langah chuan ropuiin lang mahse, an hlim leh hlim loh chu an chhungrilah, anmahni ngeiin an hria. Pawn lam landan ai chuan chhungril hlimna hi dah pawimawh zawk fo te pawh a tha hle awm e.

Hlimna tak

Mizote hi chu kan vannei khawp. Mipui tam zawk hi Kristian kan ni a, inkhawm thin hnam kan ni. Nun ning, nun hlim lo, nun khawhar etc. kan tam e kan tih rual hian inkhawmna hun leh hmun kan la nei tha a, hlimna dik tak, hlimna tluantling Isua Krista hmu tur hian hun leh hmun tha kan nei hi ka vannei hle. Nun hlimna hi khawvel rosum hian a lei thei lo. Mi hausa leh awhawm tak taka kan ngaihte hian, mi rethei, Pathian in malsawmna a vur ang tawk zela mahni chan tawka lungawi thin mite hi min awt let zawk thin. Kan thatna tur bakin Pathian hian a rel ngai lo tih kan hriat a, kan duh ang zawng zawnga Pathian hna thawhtir tur kan ni lo tih hre reng chungin; a rorela innghah ngam a, engkima lungawi zel thiam mi, Lal Isua nei mi hi mi hlim, nun hlim nei, mi awhawm te chu an ni e.