Kan thianpa
B.ROHLUPUIA
20.04.1979 — 09.06.2011 pualin...
A chanchin tlangpui
B.Rohlupuia (Mama) hi April ni 20, 1979-ah Pu B.Pangmana leh Pi F.Vanlalthuami (Nu-i) te inkarah Champhai Kahrawt-ah a lo piang a, amah hi an unauah mipa piang awmchhun niin a naupang ber dawttu a ni. A unaute:
1. B.Lallianpuii w/o Vanlaldika, Chanmari, Aizawl
2. B.Lalawmpuii (Te-i) w/o C.Lalrinawma, Zemabawk
3. B.Lalruatpuii w/o Lalthansanga, Zemabawk
Aizawlah
January ni 10. 1991 ah Champhai atangin Ramhlun South, Aizawl-ah an lo pêm thla a, Ramhlun ‘S’-ah hian kum 11 zet an awm hnuin,Kum 2002 february thla khan Zemabawk-ah an rawn insawn phei a, tuna an awmna hmunah hian In leh lote in bengbelin an awm nghet ta a ni.
Eizawnna lam
Kum 1998 khan Health & Family Welfare Department, Mizoram sorkar hnuaiah IVth Grade-in a lut a. Directorate-a engemaw chen a thawh hnuin Saitual-ah sawn a ni a, a thih ni thlengin a thawk a ni.
A mizia leh nungchang
Mama hi a naupan tet ata nu leh pa, unaute leh chhungkhat lainate tihlimtu ber a nia, thenawm khawvengte chenin an lawmin duat pawh a hlawh hle thin a. A lo puitlin hnu pawh hian thenrual ngai mi leh mi kawm thiam tak a ni chho zel a. Amah hi a zaidamin chhungte’n an hauh pawhin thimrim a khinglet ngai miahlo mi a ni.A tawng tlemin mi pawisawi hlau tak mi a ni a, amah pawh hian mi a rel ngailo.Thian ho huikhawm thiamtak niin u chan pawh a chang thiam hle a, mi thilphal tak anih avangin ama chhiat vekna tur pawh nise a thiante tan chuan engmah ui a nei ngailo.
A natna chungchang
Mama hian han insawiselna em em a nei ngai lo hle a.Mi tawng tlem leh tawrhchhel ve tak anih avang hian a nawmloh thu pawh hi a sawi khat hle. Amaherawh chu tun hnai te ah hian a nuamsamlo tih hi a hmuh theih a, Chuvang chuan ni 8.6.2011 (nilai) zanah Thawhah a sawi avangin Presbyterian Hospital, Durtlang pan pui ni a; dinhmun a that vak loh avangin ICU-ah dah luh a ni. A lûng (heart) a lo vung nasa hle tawh tih hmuhchhuah a ni a, a tuk, ni 9.6.2011 (ningani) zing dar 8:00 vel atangin biak theih lohin a awm ta a, beiseina sang tak nena kan thlir laiin chhun dar 11:00 khan min peih loh san ta a ni.
Nghilh loh nan...
Kan thianpa Puia nen khan thian dangte ang em em chuan kan inzui ve vak lo naa,ka tan hian tangkaina leh hlutna tam tak a nei a,ka nu te nen chipui an lo nihnaah unau ang takin min en ve a,tin a hun leh hmun a zirin ka u rual daih mah nise min zah der thiam em em a,mamawh huna a tlawmngaihna te kha ka tan a hlu in theihnghilh a har ka ti. Kan hun hman tlangpuite khan lung a ti lengin engtik khawtikah mah khatiang hun hlimawm tak tak kha kan hmang ho thei tawh dawn der si loa...
Amah leh ka thian dangte ho hrim hrim nen hian kum 2006 bawr chho vel atang khan kan inkhawm bang te leh kan zan leng haw hi zan rei lamah Biak In kawtah kan ti ti ho thin a, fiamthu fahrah te te nen zan rei tak tak thlengin kan nui tlang thin kha a ni a. Mi hlim thei tak leh nui ring tak a ni a, a nui hrim hrim pawh kha hlimpui tham a tling. Pa tlawmngai thei tak, a tul huna Mizo pa dik tak nih tling tak a ni a. A duh zawng a ni emaw, ni lo emaw thiante hi a ngaipawimawh em em thin.
Bike, Pulsar 180 ang chi hi a nei thin a, a tul hunah leh kan mamawhna hmunah chuan engtik lai pawha sawm theih reng tur ang hrim hian a in kau em em reng a. Kolasib kal kan hrat em em a, "Kal ila" tih tawh chuan a aw thei zel tluk a ni. Ka la hriat reng chu Kolasib lan tuma kal tumin, ka tum ai rei, ni thum ngawt ka cham ta si,ka pocket money-in a daih ta si lo, thlen in te han dil ngawt chu tlawmah ka la ve bawk si a, chutah thianpa Puia hi tlawm leh zah pawh dawn lovin ka phone tawp a,fiamthu ti deuh tak hian "Min rawn lam mai teh a" ka ti a, min rawn lam tura a rawn kal tang tang peih kha ka fak tawp thei lo, mangan laia min tanpuitu leh tanpui tura inkau reng a nih kha theihnghilh harsa ka ti.
Kolasib kan kal dun tum bawkin vawikhat pawh zan haw ka rawt a, ani chuan riah mai a duh; mahse a tûka KTP lamah programme pawimawh tak ka neih avangin a zana zana haw ka ngaih thu ka hrilh hnu chuan peih lo tak chung chuan min haw pui ta nge nge a. Khami tuma hrehawm kan tawrh dun tluka hrehawm kha a tam lo khawp mai. Serkhan khua kan la lut hman lo hret tih ah ruahpui vanawn-in min nuai a, a khawchhung thleng kan kal lui hram hram a. Zanlai dar 11:00 vel a ni tawh; mi verandah-ah rei tawk fang kan din hnuah in neitu pitar in kawng min rawn hawn a, serkhan pitar kan men dun nghek tawh. Inthlahrun a nat duh em avangin kan kal lui leh a, huh zawr hnepin zing dar 2:00 velah in kan thleng.Keimah vangin a khua a sik char char!!!
A hmelin puak a ti lo,thiamna leh thildangah midang tan han chhuan vak tur a nei lo. Mahse kei leh ka thian dangte tan erawh a hlu em em a, kumkhuaa kan hmu tawh lo tur hi ngaihtuahin a khawharthlak ka ti. Hun engemawchen kan inkawm ho tawh loh hnuah 1st June 2011 (nilaini) khan kan thianpa RD-a chhutri a rawn haw a, zanah tum loh takin kan thianho kam kim hlawl mai, Chawnpui-ah nula rim hoin hlim takin kan inkawm ho a; kan inkawm chhunzawm zel dawn emaw tih laiin rang tak maiin min kalsan ta si. Hriatthiam a har a, a mak a, nunna ah hian thu kan neih loh zia pawh min hriatchhuah tir nasa hle.
Blog post atan chuan a ho viau maithei, ka thian dangte ho zawng zawng aiawhin blog lama kan ui tlan zia hi auchhuahpui ka chak ve hrim hrim a, nakin zela kan theihngilh loha kan hriatreng theih nan tiin...
No comments:
Post a Comment