Mizo;India Sipai...

Kum 2003 bawr vel kha niin ka hre ta, kan veng weekly newspaper-ah Joint Editor ka nih laiin; current (power supply) kan neih loh avangin vawikhat chu chhuah tur ka haihchham hle mai a. Ka thiante (Ka editorial board pui te) nen chuan tih tur nei lova kan awm mai mai lai chuan Sex hman khawloh chungchang hi ka rilru-ah a lo lian ta ber mai a. "Sex chungchang hi Ziak ang u" ti-a ka'n râwn der chuan, "Nangman lo draft rawh" an ti tlat a. Chutah ka vei zawng leh theih tawkin ka'n draft ve ta nawk nawk a. Chu article-a ka han tarlan ber chu; tunlai sex hluar tawh zia leh tun atanga kum 10 velah chuan kan Mizo nu leh pa te hian an fanu te mitthi lumen leh khawhar inkal an phal ka rin loh thu ka thai lang nghek mai a. (He ka article hi nikum mai khan an chhuah nawn leh). Mahse, kha ka article khan vawiin niah hian awmzia a nei lo zawng a ni anga; sex hi a punlun zual deuh deuh mai si a nih hi...

Kum 2009 bawr vel kha niin ka hre ta- Vanglaini Newspaper-ah chuan CRP Recruitment Advertisement a lo lang a. Kei chuan ka lo hmu chiah lo naa ka thianpa ve em em, Bial Zaipawl kan nih lai pawh a ka thurualpui ber ni thin, lehkhathiam lo ve tak pakhat chuan a lo hmu fuh hlauh mai a. Ka dil peih loh zawng tak mai a nih avangin ani chu dil ve atan ka duh si a, application form chu copy 2 ngawt ka siam ta a.Kei chuan ka thehlut ta lova, ani chuan a thehlut a, a tling ta reng mai bawk a.An han training ta tehreng a; a hmaa fel tak ni thina ka hriat chu ka sipai lo hmelhriat thin te nen an zia a inang chho tan ta riau mai... An training laia min rawn call paw'n sex lama a tuah thu bak sawi tur a hre ngai ta lo!! Chhutri (chawlh) an rawn nei ta teh chêng a; kar khat vel chhungin kan riak dun a, a hmeichhe khawihchhiat min hrilh chin ringawt pawh paruk (6) an tling!! Tin, ka unaunu ngei pawhin rail-ah Mizo sipaiin risk an tum thu min hrilh bawk! rapthlak ka ti lutuk. Ka hauh in awmzia a nei lova,insawitheih nan a la hmang zui leh ta nghal... Mizo; India sipai engzat nge kan neih tih ka hre thei mai lo; pakhatin mi 6 vel khawih chhe ta zel se engzat nge an khawihchhiat ang tih ringawt rilruah a awm...

Kan thianpa fel tak pakhat, kohhran leh khawtlanga theih tawpa inhmang thin chuan hetianga sipai khawichhiat tawh pakhat hi a ngaizawng a ni awm e. A hmeichhia in engkim a hrilh si a, ani engkima in serh thianghlim rilru chu hrehawmna bakin a hmuak lovang tih a rin theih reng mai. Sipai huatna in a khat bawk. Mahse heti chunga a hmangaihna erawh kan sawi phak bak a ni; a rilru hahna leh a hmangaih thu a sawi thinna ka nih avangin ka han tarlang mai a ni. Ka tawrhpui a, ka hrethiam a, hrehawm ka tihpui bawk...

Ka han sawi tum tak chu- kan Mizo India sipai, kan chhungten kan chhuan em em leh kan innghahna hian sum tam tak thawnin la lut mahse, mi fa engzat nge an tihchhiat a, engzat nge mi beidawng (mi pangngai lo) ah an siam; an nu leh pa te lah hian zahpui a hnekin sipai ngaizawng fanu nei neih chu an la inngaisang viau lawi si ho hi kei zawng sum thawkchhuak hnemin kan Mizoram economy vawrh sang dawrh mahse; mi fel tak tak; Native Mizo te hian an sulhnu kan chhui zel dawn em ni (?) tih hi kan thianpa atanga ka zirchhuah a ni ve tlat. Pathian paw'n a huat em em mipat hmeichhiatna hi Sipai nih vang ngawta hnualsuat tur chi em ni??? Ni dawn ta se, sipai aia hun leh hmun nei tha, sipai ni si lo ho hian khawihchhiat tur kan zawng luai luai mai zawk dawn em ni... Kan sipai te kan chhuang lutuk, mahse mipat hmeichhiatah insum thei se ka duhthusam...