A lo nep theih ngei mai

Naupan tet atangin, samah sam luat a awm lo tih ang deuh khan, "Ka college kal ve hun chu(h)..." tiin duhthu ka lo sam ve nasa thin kha a ni a. Nghakhlel tak chung leh kal ve hun tur thlir chung ranin hmanhmawh tak si hmanhmawh hleithei si lovin kan kal chho ve bauh bauh a, tun hun kan thleng ta. Inbuatsaih chhung leh nghahhlelh chhunga rei ai daih in a luh chhung a rei lova, kan kal tluan zel phei chuan loh theih lohna avangin 'ba-bai' a lo nga dawn ta reng mai. College student nih hi nuam viau mahse engemaw kawng zawng tak chuan a lo ho angreng hle mai.

Kan naupan laia kan duhthu lo sam thin piahlam daih, Hrangbana College, Mizorama College lian ber leh tha tehnaah pawh lang phak khawpa  thaa lut thei ka ni erawh  vannei ka inti thlawt.Hrangbana College luhkaa nitin mai, thiamna leh finna zawnga ka tek lut ve thei hi vanneihna chhiarsen loh a ni. He kan College tan hian thil tha pui han tih ve ka chak hle mai. Result tha neiin chawimawina hlawh han tum dawn ila, ka thiamna in a tlin si lo; College tan Gold Medal han beisei ve dawn ila, ka tha-in a tlin bawk si lo, engmah theih ka nei lo tih ka inhria. Amaherawhchu ka chawimawi loh pawh hian Pathian khawngaihna avang chauhin a ropui sa hrim hrim. Kan College chawimawi theitu awmchhun kan Pathian laka rinawm taka awm mai hi ka tih theih awmchhun niin ka inhria. (Kan thupuiah kan luh thelh takngial dawn...)

Nitin class kal turin, chhungte thawhchhuah sa nen kan in ak chhuak a. Min chawmtute beng hriatah chuan tum sang tak tak kan nei fur a; chhungte tih lawm hi kan tih theih awmchhun a la ni miau si.Class kal theuh theuh, College-a kan kal dan chu a inang lo thei viau ang. Nuam ti tak te, hrehawm ti tak te, ho ti tak tak te kan kat nuk hlawm a.He zawhna, "Class kal hi nuam i ti nge hrehawm i ti,nge a ho?" tih hi chhan tur ni ta se, 'A ho' ti te zingah ka tel ve ngeiin  ka ring. A nuam ka ti lo a ni bik lo, hrehawm ka ti lo bawk hek lo, mahse keimah bikah chuan (ka thiante pawh an tel) class kal hi a ho em a ni. Keimah/keimahni chauh ka/kan ni bik chuan ka ring lo, ka sawi thiam dan berah chuan 'Kan awm ve tawp' a ni deuh ber mai, kan nep a ni mah zawk. Thianpa Rema'n, "Kan College life hi a ho em mai" a tih tlawk tlawk thin te kha a lo va dik em!

Tunhma te kha chuan class kal hi thian zawn nan te, chhass zawn nan te an lo hmang thin.Tun thleng pawh hian a tam zawk chuan an la hmang ni te pawhin a lang. Mahse keini ve zawng chuti hlauh! Tlai hlau  em emin hmanhmawh pheleng leh thlan sa phungin 1st period kan han tlai hram a. Inthlahrung deuha luh kanhan dil hnuah period khat chu kan han tlingtla ve hram a. Off a lo ni a, tih tur dang vak hre lo chuan Chanmari market luhka step-ah bawk chuan thianza ho kan kim leh thap thin. Chutah nula che vel kan lo kawk kual zut zut a, fiamthu fahrah te te sawiin kan nui thler tak duar duar a. Ngaihtuah zawng a ni vak lo nen, class neih te chu sawi loh, tlema hmaitlang tha kan tih ve deuh te pawh kan pel ngam tawk a ni ber mai.

Thian thu-hlaah lah thianpa Hriata tawngkam takin, kum thum kan luh chhung hian, kan Honours puite leh hmelhriat sa tlemte tih loh chu han biak chawt ngam kannei reng reng lo. Nakin hun thlenga thian tha sawi tur tuna kan lo siam lo hi chu a la pawi thui dawn teh e. 'Hmanah kan college-a kal ve thin, BA kan kal laiin kan classmate thin' tiin kan la tawp ve mai mai dawn a nih hi maw!

BA zir chhung hian hmalam hun tur sut kuak a lo har dawn hle mai. Hmana 'BA mawl' an lo tih thin, awm thei pawha kan ngaih loh leh kan lo nuihzat thin ang kha, han zir ve tak tak chuan a lo nih theih dawn hle mai. Mite chuan BA zir pha ve tawh chu engkim hre vek turah an lo ngai si anga. Kei BA zir ve tawh hi an ngaih ang ka phak leh phak loh tur chu ka chiang reng mai si, a va nep theih hluah hluah tak em! saptawng kan thiam loh zia te hi... Tunhmaa kan lehkha zir dan lo diktawk loh vang nge, pass na tur khawp ngawr ngawr bak chu saptawng a thiam loh theih hle mai. A tawnga tawng ngat phei chu, fiamthu kan thawh ta emaw tih tur khawpin, inhlutsak a hnekin kan innuihzat a. A hmanna tur a tam vak lo nen, kan lo nep kher bawk nen, 'BA laktlak loh' nih a lo har dawn lo hle mai.

Kan nih tum min han zawt se, hna sang tak tak kan chham zel zul a. A nihna takah chuan khang hna sang tea thawk tur khan min rawn ngen ngawih ngawih te a nih ngawt loh chuan, a tak ram thlen a har dawn hle le mai. Lehkhabu tha aia incheina tha leh mawi hria, lehkhazir aia a behbawma buai taima, tawngtaina in aia canteen thlahlel, class aia common room ngaina, zirlai nih aia college kal nuam ti etc. han nih ngat chuan hmalam leh chatuan kawl hi a eng fahran lo hle. Bazarpui leh haw kawng bak engmah kan hre bel thei lo reng a ni.

Aw...kei misual ang hi engzat tak awm ang maw...? An awm loh ka ring si lo, awm ve atan chuan ka phal bawk si lo!! A...lo awm ve palh hlauh pawh nise, thianpa Nghaka tawngkam han hawn ta lawk ila,"Lehkha zir tang tanga, Officer lain tak tak leh sumdawng hausa pui pui nih ai chuan, vote khat den den hmanga Chief Minister nih hi a hlawk zawk" tiin kan inhnem tlang dial dial a ni tawh mai ang chu.

(Hrangbana College Annual Magazine 2004-2005

Silver Jubillee Souvenir. Page 146-147)